മഴ, ഒരു പകുതിയിലും മറുപകുതിയിലും

 മഴ, ഒരു പകുതിയിലും 

                         മറുപകുതിയിലും

ആത്മാനുഭൂതിയായ് ആത്മഹർഷമായ്

ആത്മാവിലേക്കൊഴുകി വരും മഴ,

ആനന്ദമായ് ലാസ്യനടനമായ്

കവിതയായൊഴുകും മഴ,

ഒരു പകുതിയിൽ -

ആഹ്ലാദവും ആശ്ചര്യവും

കടലാസുതോണിയായ്

കുഞ്ഞോളങ്ങൾ തട്ടി നീങ്ങവേ ...

മറുപകുതിയിൽ -

നനഞ്ഞു കുതിർന്ന ഭയത്തിനപ്പുറം

തിരമാല പോലുള്ളൊരു 

നെഞ്ചിടിപ്പായ് മാറുന്നു.

ഒരു പകുതിയിൽ -

പ്രണയത്തിൻ ചൂടു -

ചേർക്കാൻ വെമ്പുന്ന കടലായും

വിരഹത്തിൻ ചുഴിയായും മാറവേ...

മറുപകുതിയിൽ -

പശിയുടെ കടലോളമെത്തുന്ന

നിലവിളിയായൊഴുകുന്നു.

ഉച്ചിയിൽ നിന്നു

താഴോട്ടുചാടുന്ന അവളെ

പിടിച്ചുകെട്ടാൻ ചിലർ;

ഉച്ചിയിൽ നിന്നു 

താഴോട്ടുചാടുന്ന അവളിൽ

പിടഞ്ഞു തീരാൻ ചിലർ;

അങ്ങനെ, പല മുഖങ്ങളിൽ

പല ഭാവങ്ങളിൽ

പലർക്കും പലതായ്

മഴ പെയ്തു കൊണ്ടേയിരിക്കുന്നു.